Т.Сариев: “Элибиз мындан ары туруктуу жана үзгүлтүксүз жаратылыш газы менен камсыз болот” (ВИДЕО)

24 июня 2015, 15:49

Бүгүн, 24-июнда Кыргыз Республикасынын Премьер-министри Темир Сариев Чүй облусуна иш сапарынын алкагында “Газпром-Кыргызстан” ЖЧКсынын газ өткөрмө тутумунун обьекттери менен таанышты.

Алгач Премьер-министр Темир Сариев Москва районунун Беловодское айылында “Газпром-Кыргызстан” компаниясынын Бишкек жана Чүй облустарын 2015-2019-жылдарга газ менен камсыз кылууну өнүктүрүү планы менен таанышты. Анын жүрүшүндө “Газпром” ААКсынын башкармалыгынын төрага орун басары, “Газпром-Кыргызстан” ЖЧКсынын директорлор кеңешинин төрагасы Виталий Маркелов менен “Газпром-Кыргызстан” ЖЧКсынын башкы директору Болот Абилдаев аталган планды ишке ашыруу боюнча маалымат берди.

Болот Абилдаевдин айтымында, учурда Бишкек шаарында узундугу 1089 чакырым газ түтүкчөсү колдонулуп, 169 миң үй жана имарат газ менен камсыздалган. 2019-жылдын аягына чейин дагы 33 чакырым газ түтүкчөсү курулуп, 40 миңден ашык үй жана имарат газ менен камсыздалат. Мындай жол менен алдыдагы үч жыл аралыгында “Газпром-Кыргызстан” 36 миллиард рубль жумшап, 2019-жылга чейин Бишкек шаары жана Чүй облусунун аймагынын 69,7 пайызын газ менен камсыз кылууну пландап жатат.

Анын алкагында Бишкек шаарындагы 22 жаңы конуш жана Чүй облусундагы 42 айыл жаратылыш газы менен камсыз болмокчу. Муну менен катар өлкө аймагындагы газ түтүкчөлөрү жаңыртылат.

Премьер-министр Темир Сариев өз сөзүндө “Газпром-Кыргызстан” ишканасынын ишин жогору баалап, Кыргызстанда ишке ашырып жаткан долбоорлору үчүн ыраазычылык билдирди. Өкмөт башчынын айтымында, “Газпром” сыяктуу дүйнөлүк ири компаниянын келиши Кыргызстан үчүн чоң мааниге ээ.

“Газпром-Кыргызстан” компаниясы Кыргызстандын газ инсфрактурасын өнүктүрүүгө 100 миллард рубль салууну убада кылган. Алдыдагы үч жыл аралыгында “Газпром-Кыргызстан” Бишкек жана Чүй облусунун аймагынын 70 пайызын газ менен камсыз кылууну пландап жатат. Ал жаратылыш газы жетпеген Ысык-Көл, Нарын облусу сыяктуу аймактарга суюлтулган газ камсыз кылуу боюнча иштер аткарылат. “Кыргызгаз” ишканасын “Газпромго” сатууда айрым адамдар чочулап, бул демилгени сындап чыгышкан эле. Бирок учурда ал чочулоолор негизсиз экени анык болуп жатат. Эң негизгиси, мындан ары элибиз туруктуу түрдө, үзгүлтүксүз газ менен камсыз болот”-деди Темир Сариев.

Дискуссия еще не началась.
Вы можете оставить первый комментарий.

Информация

Комментировать статьи на сайте возможно только в течении 360 дней со дня публикации.

KABARLAR.ORG 2020