30 июня 2015, 19:00

Премьер-министр Темир Сариев «РИА Новости» басылмасынын журналисттери менен жолугушту

Бүгүн, 30-июнда, Премьер-министр Темир Сариев «Россия сегодня» эл аралык маалыматтык агенттик өкүлдөрү менен жолугушуу өткөрүп, анын алкагында Кыргызстандын экономика жана саясат маселесиндеги актуалдуу тенденциялар тууралуу маек берди.

Маек жүрүшүндө Кыргызстандын ЕАЭБге кошулуу процессиндеги өлкөнүн экономикалык абалына, ошондой эле евразиялык интеграциянын кыргыз бизнесине тийгизген таасири сыяктуу маселелер козголду.

Батыш тараптын Россияга каршы жасалган санкциялары Кыргызстан жана Россия аралык импорттук-экспорттук мамилелерге кандайча таасир тийгизгендиги тууралуу суроого Өкмөт башчы жооп бергендей, бүгүн Кыргыз Республикасы айыл чарба продукциясын, тактап айтканда, экологиялык жактан таза продуктуларды импорттоого басым жасоодо.

«Россия – Кыргызстандын негизги экономикалык шериги. Биз көп нерсени импорттоп, ошол эле учурда экспорттоп да жатабыз. Биз майда товардык өндүрүшкө ыктап, белгилүү негизди түптөй алдык. Биз экологиялык жактан таза тамак-аш продуктуларын өндүрүү жаатында атаандаштыктан тыш турабыз», – деди Өкмөт башчы.

Темир Сариев кошумчалагандай, айрым россиялык компаниялар менен биргеликте ири инфраструктуралык долбоорлорду ишке ашыруу боюнча келишимдер түзүлгөн. Мындай компаниялардын бири катары Нарындагы ГЭС каскадын курууга катышып жаткан «РусГидро» ААК кирет.

Журналисттер мындан тышкары үстүбүздөгү жылдын июль айында Уфада белгиленген Шанхай кызматташуу уюмунун саммити алдында Кыргызстандын аталган уюм алкагындагы долбоорлорду ишке ашыруу боюнча пландарына кызыгышты.

Ошондой эле Афганистандагы кырдаалдын курчушуна жана андагы радикалдык экстремисттик топтордун активдешүүсү тегерегинде суроолор берилди, ага карата Премьер-министр “өлкөнүн укук коргоо органдары жана куралдуу күчтөрү күчөтүлгөн режимде иштөөдө жана тийиштүү учурда радикалдык топтордун жана бандиттик түзүмдөрдүн күчүн майтарууга даяр” деп жооп кайтарды.

«Биз өзүбүздү коопсуздандыруу боюнча иш-чараларды кабыл алуудабыз Куралдуу күчтөр тийиштүү жабдылган. Чекара кызматына өзгөчө көңүл бурулуп: жабдуу күчтөндүрүлүп, посттордун саны жогорулатылган, кызматкерлер атайы техника жана жабдуулар менен камсыздалган», – деди Темир Сариев.

 

Дискуссия еще не началась.
Вы можете оставить первый комментарий.

Информация

Комментировать статьи на сайте возможно только в течении 360 дней со дня публикации.

KABARLAR.ORG 2020