6 августа 2015, 17:24

Т.Сариевдин төрагалыгы алдында КРнын ЕАЭБге кошулуу шартында чек араларды ачууга даярдык боюнча жыйын өттү

Бүгүн, 6-августта, Кыргыз Республикасынын Премьер-министри Темир Сариевдин төрагалыгы алдында Кыргызстандын Евразия экономикалык союзуна кошулуу шартында чек араларды ачууга даярдык боюнча жыйын өттү. Өкмөттүн басма-сөз кызматынан кабарлашкандай, жыйын жүрүшүндө Премьер-министр Темир Сариев Кыргызстандын Евразия экономикалык союзуна кошулуусу боюнча келишимди Казакстан Республикасынын Президенти Нурсултан Назарбаев кол койгонун жана тиешелүү нота Евразия экономикалык комиссиясынын жөнөтүлгөнүн кабарлады. Буга чейин аталган макулдашуу жараянын Армения, Беларус жана Россия Федерациясы толугу менен аяктаган эле. Премьер-министрдин айтымында, Евразия экономикалык комиссиясы аталган нотаны расмий түрдө алып, каттаган соң Кыргыз Республикасы Евразия экономикалык союзунун толук кандуу мүчөсү деп таанылып, чек аралар ачылышы керек. Темир Сариев бул жараян кийинки аптанын башында болорун жана кыргыз-казак чек араларынын ачыларын кабарлады.

Буга байланыштуу Темир Сариев тиешелүү мамлекеттик органдарды чек араларды ачууга даярдык көрүү жана чек аралар ачылган соң жарандарга жеңилдиктер түзүлөрү тууралуу түшүндүрүү иштерин жүргүзүү тапшырмасын берди.

“Кыргыз Республикасы Евразия экономикалык союзунун толук кандуу кошулуп, чек аралар ачылган соң ар бир мамлекеттик органдар ишти макулдашылган негизде жүргүзүүсү абзел. Ар бир орган өзүнө тагылган милдеттерди ыкчам жана сапаттуу түрдө аткарышы керек. Жарандарыбыз, ишкерлер жана чет өлкөгө чыгып жаткандар кандай өзгөрүүлөр боло турганы тууралуу кабардар болушу кажет”-деди Темир Сариев

Муну менен катар Премьер-министр Экономика министрлиги, Эмгек, миграция жана жаштар министрлиги, Мамлекеттик Бажы кызматы жана Тышкы иштер министрлигине бул жаатта түшүндүрүү иштерин күчөтүү тапшырмасын берди.

Ошондой эле Экономика министрлигине 7-августка чейин мамлекеттик чек арадагы өзгөрүү шарттары (бажы көзөмөлү, транспорттук көзөмөл, миграция саясаты, салык режими, ветеринардык-фитосанитардык көзөмөл) боюнча өзгөрүүлөр тууралуу деталуу маалымат даярдоо, Саламаттыкты сактоо министрлиги, Салык кызматы, Бажы кызматы, өкмөт алдындагы Тамак-аш, ветеринария жана фитосанитария коопсуздук боюнча мамлекеттик инспекцияга кыргыз-казак мамлекеттик чек арасында түшүндүрүү иштерин жүргүзүү үчүн нөөмөттөгү кызматкерлерди жайгаштыруу  буйругун даярдоону тапшырды.

Ошол эле учурда тиешелүү мамлекеттик органдарга кыргыз-казак чек арасында ачуу аземин уюштуруу тапшырмасы берилди.

 

Дискуссия еще не началась.
Вы можете оставить первый комментарий.

Информация

Комментировать статьи на сайте возможно только в течении 360 дней со дня публикации.

KABARLAR.ORG 2021